Káí Kicabli est un espace d'archive numérique retraçant les interconnexions familiales, culturelles et linguistiques du peuple Vútè du Cameroun et sa diaspora. Cette initiative est mise en place dans un but de recherche, d'archive et d'éducation conçu par et pour le peuple vútè aussi connu sous le nom de wute ou Babouté.
Cet espace est ouvert à toute personne, association, organisme qui souhaite collaborer afin d’en faire une véritable « bibliothèque numérique ».
Pour écrire, modifier et participer à la construction de cet espace il vous suffit de créer un compte ou nous contacter au mail vitib@proton.me. Nous privilégions des collaborations et des participations de personnes vútès, mais sommes ouvert·es à toutes personnes détentrices d'un savoir allant dans le sens de cette recherche.
Le projet Káí Kicabli, géré par l’association ii-média est une initiative culturelle camerounaise. L’objectif de ce regroupement est d’archiver numériquement des savoirs culturels, linguistiques et historiques liés à l’histoire « vuté » du Cameroun, d’Afrique et sa diaposra. Motivée par des valeurs décoloniales, cette initiative tente de s’autonomiser à travers la création de ce wiki. Cet exemple pourra s’étendre à d’autres ethnies camerounaises et ses diasporas.
Káí Kicabli est un projet porté par le groupe “íígraph. La première mission a été réalisé par l'équipe Túúŋ Taàm :
Ce projet se poursuit par les efforts des Membres du groupe ii-graph
Webdesign et coding : Mbaah Laurent Simba
Nombre de pages : 342
Modifié le 09 December 2025 - 14:17
(Góòmɓwê Mk 9.33-37; Lk 9.46-48)
(1) Ɓwâ kɨ́ á nɨ̀fuùb Yésùù ya ŋgɨɨso gín nóò, ɗà ŋgáb ɨ́ fɔ̂ ŋgə́ ɨnè: «Na ma ɨ́ duce jíri Haam Mèèín no?» (2) Á Yésù ɓéwo mutí kù, ŋgə́ ɨ́ kɨ̂ ŋgə́ ŋgábè tíí. (3) Ŋgə́ ɨ́ tà: «Mɨ tanaɓa nyí àmɨɨr wááŋ á, nyí ɨ́ dù ɓàndɨ̀wá dùnɨ hȩ mucutɨ́b, nyí kwá nɨ Haam Mèèín no lə́ɓàr. (4) Nò jíri Haam Mèèín no kwe du nò gesé síí ɗàá, ɗà ŋgə́ ɨ́ dùcù hȩ mutí rɨ á. (5) Nò gamndé mutí ti ɨnèé yó ɓe ɨ́r moò rɨ, nò kɨ́ gamɓa mɨ nɨ̀mɨr á.»
(Góòmɓwê Mk 9.42-48; Lk 17.1-2)
(6) «Nò kwá njóoré nɨ̀mwi̧ mvókín mucutɨ́b ə́mne mɨ rèè cumí, á nyɔ̧ɔ̧́ péín nò kíì kùb kóllébɨ̂ŋ ŋgə́ jùm kàm kù ya, kùb a lèèrê ŋgə́ mɨ̀kwehɨ̀rí. (7) Jábɨ́r á ɓe nùb ɗɔ̀ɔ́b lè no du ndɨ̀ŋnɨ nɨ̀vɨ́tɨ̀b guré cumí. Á ɗúhá nɨ nɨ́ɨ́b kɨ́ ndɨ̀ŋtɨ. Ɨ́dù mɨ kɨ́nnaá nò ɓa dùnɨ ɗùŋ gusɨ̀r kíì. (8) Ŋgáár woò, kɨ́ kù gurub woò ɨ́ dù wu gèrénɨ cumí, tȩ́nɨkɨ́ɨm ŋgáb, wu a lèèɓà ŋgáb cóo, á nyɔ̧ɔ̧́ wu lə́ mè àmɨrìí no ɓe ŋgáár mwi̧ kɨ́ kù guur mwi̧, ɨ́ ndôŋ kɨ́ wu gə́tɨ ŋgárɨ̀b ɓe gurub, kùb a tì lèèrê wu wa du lɨ́ɨ̀mnɨ lɨ́mîn ɗàwáá nokwe. (9) Íí woò ɨ́ dù wu njóknɨ wu ndɨ̀ŋ cum, mvéekɨ́ɨm ŋgə́, wu a lèhè ŋgə́ cóo; á nyɔ̧ɔ̧́ wu lə́ mè àmɨrìí no ɓe íí mwi̧, ɨ́ ndôŋ kɨ́ wu gə́te íí woò bɨrɨ́b lâs ɗà kùb a tì lèèrê wu wa du lɨ́ɨ̀mnɨ lɨ́mîn ɗàwáá no kwe.»
(Góòmɓwê Lk 15.3-7)
(10) «Nyí nɨ mucutɨ́b lè pə́tə̀ə̀ŋkɨ̂r, mɨ tanaɓa nyí àmɨɨr wááŋ á, dùgallɨb ŋgábè du còmné á bɨ ɓwâ lâs ə́ŋhîn ɓe Tá moò du ɓɨllɨnne. (11) [Ɓetí Mwin Nɨ̀rì ya go nɨ ɓátɨ̀nɨ nùb ya lɔ̧́ré á.]
(12) «Ní á nyí lə́əmce? Nɨ̀vɨ́tè ɨ́ dù ɓe ndèɗúúb təmərì, ɗà mwi̧ ɨ́ lɔ̧́hô̧, ŋgə́ tɨ̀ nɨ kɨ́b vii nààsɨ̀b ɨ́ cóóŋ ɨ́ ɓwécɔ̧́ meré ɓeè mbɨ́kkɨ́sòwá, ɗà ŋgə́ a gì mánɨ kɨ́ mwi̧ kɨ́ à? (13) Ŋgə́ ɨ́ kwàcù kí, mɨ tanaɓa nyí àmɨɨr wááŋ, mɨ̀tɔ̀k ŋgə́ ók ɓe ɨ́r nɨ̀mwi̧ kíì ndóŋtɨ́ kɨ́ ŋgə́ ók ɓe nùb vii nààsɨ̀b ɨ́ cóóŋ ɨ́ ɓwécɔ̧́ tɨ du lɔ̧́wa ɗàrɨ́. (14) U̧nè á ɓwê Tá nyínè du ɓɨllɨnne du ɗúwa nɨ̀mwi̧ kpáín mucutɨ́b lè no kwe lɔ̧́hó̧tɨ.»
(15) «Mwin yàá wo kù ɨ́ ndɨ̀ŋ wu ɓáŋhîn, gɨm ŋgə́ kwànɨ nyíne ŋgə́ bɨrɨ́b, wu a nyìnnà ŋgə́, túùmnànɨ ŋgə́ ɓáŋhîn ŋgə́ ndɨŋ wé. Ŋgə́ ɨ́ óknà wu, wu ɗə̀ə̀ŋtɨ wu gecurótɨ́ mwin yàá woò kpánȩ́ȩ́. (16) Ɨ́dù ŋgə́ ɨ́ mvû wu ónɨ, ɓégem nɨ̀vɨ́tè mwi̧, kɨ́ kù bɨrɨ́b, ɓetí káàtà Mèèín wáatɨ́ ɨnè: ‹Ŋgù̧ú̧ dùhá ɓe mɨ̀námé bɨrɨ́b kɨ́ kù taarɨ́b.› (17) Ɨ́dù ŋgə́ ɨ́ mvúhâ nɨ́ ŋgáb ónɨ, tanam mɨ̀kwìn nùb ə́mní. Ŋgə́ ɨ́ mvû ónɨ mɨ̀kwìn nùb ə́mní, pə́cɨ̀ wu ŋgə́ hȩ nò ə́ə́m sumí ɗàwáá, kɨ́ kù hȩ nò ɓáhe làmpóò.
(18) «Mɨ tanaɓa nyí àmɨɨr wááŋ á: nɨ́m nyí ɓa kààŋnɨ ɗàá lâs, kùb ɓa kààŋɓwênɨ còóm á. Nɨ́m lâs nyí ɓa ə́ə̀mnɨ kùb ndɨŋ ɗàá hò̧neè, kùb ɓa ə́ə̀mnɨ nɨ́m kɨ́ ndɨ̀ŋɓwê còóm á.
(19) «Àmɨɨr ɓà, mɨ tànà nyí, nɨ̀vɨ́tɨ̀b bɨrɨ́b mvókín nyínè noò ɨ́ ɓáhè yá mwi̧ ɓwèìnɨ nɨ́m lâs ŋgáb ɗúré mɨ̀yú̧ ŋgábè no, Tá moò du ɓɨllɨnne ɓa ŋgáb nànɨ á. (20) Ɓetí yá nɨ̀vɨ́tɨ̀b bɨrɨ́b kɨ́ kù taarɨ́b ɓáhe ɓe ɨ́r moò rɨ, mɨ á ŋgábè tə̧ə̧́.»
(21) Kí á Píyéèr ya ŋgɨɨso gín Yésùù, ŋgə́ ɨ́ fɔ̂ ŋgə́: «Kéké, gwì meeb á du ɗúnɨ mɨ tɨ́í mwin yàá moò, ɓè ŋgə́ du ùwèèwá ndɨ̧̀ɨ̧́ mɨ ɓáŋhɨ́nne? Mɨ tɨ́í ŋgə́ gwì tɨ́ɓaám à?» (22) Yésù ɨ́ pììnà ŋgə́: «Éìye, mɨ wu tànàwá gwì tɨ́ɓaám, ɨ́dù tɨ́ɓaám tɨ́ɓaám gwì vii taarɨ́b ɨ́ cóóŋ. (23) Ɓe àm kɨ́ á Ŋgɔ̧́ɔ̧̀ Mèèín du fɨ́tîn ɓe sà̧à̧ rè: Mvèìn jíri kù yaá ɗúnɨ ɗə̀ə̀ŋnɨ fain njɔdɨ̀b noò yi du nùb ə́ré noò ŋgáréè. (24Hȩ ŋgə́ yaré fàìnniì, kùb ɨ́ gèwònà ŋgə́ nò ə́ré kù mwi̧ ya du ɓe mwèìn ŋgéé só ɗéé. (25) Hȩ nò kɨ́ yi du nɨ́ ɓe nɨ́m ŋgə́ njáble nóò ɗàwáá, á tá no ə́ré yi ta kùb sə́rɨ̀kɨ́ ŋgə́ ɓe gwi noò, ɓe munɨ́b noò, ɓe nɨ́m ŋgə́ du ɓe kíí lâs, kùb a gòmcùnà ní mwèìn níì. (26) Nò ə́ré rè ɨ́ gùcáàmsê tá no ə́ré tíí ŋgə́ yóŋnɨ, ŋgə́ ɨ́ tà: ‹Jíigwaháye mɨ ŋgób, mɨ ɓa wu gòmnànɨ lâs á!› (27) Hȩ tá no ə́ré yi ók ŋgə́ mwàmí, á ŋgə́ mbɨ́kkɨ́na ŋgə́ nyamandì kɨ́. Ŋgə́ ɨ́ tà ŋgə́ gìi. (28) Fô̧ ŋgéé ɓèé, ŋgə́ ɨ́ ɓàndê ɓe kùŋ ɓwà no ə́ré kù ya du ɓe mwèìn noò só ví̧i̧ ɗàwáá. Ŋgə́ ɨ́ bɨ̀rê ŋgə́ mȩ̀ȩ́ lák, ŋgə́ a tace: ‹Njáabna mɨ nyamandì moò du wó sóò!› (29) Kùŋ ɓwà noò ɨ́ gùsê no ɓusiín. Nò kɨ́ ɨ́ yôŋ ŋgə́ ɨnè: ‹Jíiháye mɨ ŋgób, mɨ ɓa wu gòmnànɨ á!› (30) Ɨ́dù ŋgə́ ɨ́ mvû ónɨ kùŋ noò mwàm. Ŋgə́ ɨ́ kɨ́klê nò kɨ́ dúú nìrì, móŋnɨ há̧á̧ ɓwâ nò kɨ́ yi ɓa gòmnɨ mwèìn kíì. (31) Ɓwâ nùb ə́ré kù ya pə́ nɨ́m ŋgə́ yi ndɨŋ kíì, ŋgáb ɨ́ ókɓà yəré cei ɗà ŋgáb ɨ́ gì átɨ̀nànɨ tá ŋgábè ə́ré. (32) Kí á tá ə́ré ɓéwo nò ə́ré rè, ŋgə́ ɨ́ tànà ŋgə́: ‹Wu njɔ̧̀ sòòm ndè, wu nò ə́ré ɓáŋhîn á ye! Mɨ tɨ tɨ́ttɨ́ wu ɓe nyamandì moò tɨ du wó sóò lâs, àm wu tɨ yóŋ mé. (33) Tɨ nɨ sàmàìn wu ókɓwée kùŋ woò mwàm hȩ mɨ tɨ ókna wé ɗàwá à?› (34) Tá ə́ré ɨ́ ókɓà njù̧, ŋgə́ ɨ́ kɨ́klê nò ə́ré rè nìrì móŋɓwênɨ há̧á̧ hȩ ŋgə́ ɓa gòmnɨ nyamandì ŋgéé.»
(35) Kí á Yésù ya kpɔɔrégwa: «U̧nè ɓwê á Tá moò du ɓɨllɨnne ɓa nyí ndɨ̀ŋnɨ ɓè nyí du mwin yàá nyínè tɨ́íwa ɓe sum mwi̧í̧.»